Ministria per Evropën dhe Punët e Jashtme

Deklarata e Zëvendëskryeministres dhe Ministres së Punëve të Jashtme të Hungarisë

Ministër Hoxha, Shkëlqesia Juaj, mirë se erdhët në Hungari.

Pata kënaqësinë të mirëpres sot Ministrin e Punëve të Jashtme të Shqipërisë, Ferit Hoxha, në vizitën e tij zyrtare, e cila është edhe vizita e tij e parë zyrtare në Hungari.

Së pari, shqyrtuam marrëdhëniet tona dypalëshe, si dhe zhvillimet rajonale.

Shqipëria është një vend aleat në NATO dhe një vend kandidat për anëtarësim në Bashkimin Evropian. Ne ndajmë gjithashtu një histori jashtëzakonisht të pasur. Do të dëshiroja të përmendja paraardhësit tanë, si János Hunyadi dhe Skënderbeu, të cilët luftuan së bashku për qëllime të përbashkëta. Dhe ja ku jemi sot, duke u përballur me sfidat moderne dhe duke përcaktuar objektiva të përbashkëta.

Ekonomia është një nga fushat ku marrëdhëniet tona janë veçanërisht të forta. Shkëmbimet tona tregtare dypalëshe janë rritur me 14% në nivel vjetor, por ka ende hapësirë të konsiderueshme për rritje të mëtejshme. Edhe këtë çështje e diskutuam sot.

Kompanitë hungareze kanë gjithashtu mundësi shumë të mira në Shqipëri. Do të përmendja OTP Bank, e cila ka një prani të rëndësishme në treg, si dhe Wizz Air, që jo vetëm lidh dy kryeqytetet tona, por e lidh Shqipërinë me 19 vende përmes destinacioneve të ndryshme. Jam e sigurt se Feriti do të flasë më shumë për këtë.

Ramë dakord gjithashtu se Shqipëria duhet t’i bashkohet sa më shpejt tryezës sonë në Bruksel.

Shqipëria është ndër vendet kryesuese në procesin e anëtarësimit në BE dhe po ndërmerr reformat e nevojshme për t’u bërë pjesë e Bashkimit Evropian.

Në Hungari jemi veçanërisht krenarë që grupkapitulli i parë i negociatave u hap gjatë Presidencës hungareze të Këshillit të Bashkimit Evropian. Shqipëria ka mbyllur tashmë katër kapituj negociatash dhe shpresojmë që të tjerë të mbyllen në të ardhmen e afërt.

Për ta mbështetur më tej Shqipërinë në rrugën e saj drejt BE-së, ne nuk po shfrytëzojmë vetëm kuadrin tonë dypalësh, por i jemi bashkuar edhe grupit të Miqve të Ballkanit Perëndimor, ku jemi anëtarë së bashku me Shqipërinë. Do të takohemi përsëri pas dy javësh në Athinë, në takimin e ardhshëm të këtij grupi.

Përtej politikës, dëshiroj të përmend edhe mbështetjen teknike dhe praktike që po i ofrojmë Shqipërisë në procesin e anëtarësimit në BE.

Dy ekspertë të lartë hungarezë po punojnë ngushtësisht me Qeverinë shqiptare, duke ofruar ndihmë konkrete për negocimin dhe mbylljen e kapitujve të anëtarësimit. Njëri prej tyre punon drejtpërdrejt me Ministrinë tuaj, ndërsa eksperti tjetër punon pranë Kryeministrisë.

Kemi gjithashtu një mekanizëm të quajtur Dialogu Diplomatik i Budapestit. Në kuadër të tij, javën e kaluar pritëm dhjetë zyrtarë shqiptarë për të diskutuar mbi sektorin e bujqësisë dhe mënyrat se si mund t’i ndihmojmë kolegët tanë shqiptarë të përmbushin kërkesat dhe të zbatojnë reformat e nevojshme për anëtarësimin në Bashkimin Evropian.

Po vijojmë të ndërmarrim hapa edhe për thellimin e bashkëpunimit në fusha të tjera, përfshirë arsimin dhe kulturën.

Stabiliteti dhe siguria e Ballkanit Perëndimor mbeten me rëndësi të jashtëzakonshme për të dy vendet tona. Ne shërbejmë së bashku në KFOR, ku trupat tona veprojnë krah njëra-tjetrës për të garantuar paqen dhe stabilitetin.

Një Ballkan Perëndimor paqësor dhe i begatë është në interes të të gjithë Evropës. Për këtë arsye, ne do të ruajmë nivelin e angazhimit tonë në KFOR edhe në të ardhmen e parashikueshme.

Edhe një herë, dëshiroj t’ju falënderoj, Ministër Hoxha, për praninë tuaj këtu dhe t’ju përgëzoj për programin e pasur të vizitës.

Dëshiroj gjithashtu të ndaj me publikun se ju do të mbani një prezantim në Universitetin Ludovika dhe do të merrni pjesë në një diskutim sipas rregullit Chatham House me studiues dhe ekspertë të lartë të Institutit Hungarez të Çështjeve Ndërkombëtare.

Këto dy angazhime dëshmojnë gjithashtu përkushtimin tuaj ndaj miqësisë mes vendeve tona.

Ju faleminderit shumë.

Deklarata e Ministrit për Evropën dhe Punët e Jashtme të Shqipërisë, Ferit Hoxha

E nderuar Zëvendëskryeministre dhe Ministre e Punëve të Jashtme, e dashur Anita,

Ju falënderoj shumë për mikpritjen e ngrohtë dhe madhështore që më keni rezervuar.

Isha i bindur se, duke ardhur këtu, do të gjendesha mes miqsh. Do të isha në një vend mik, në një vend që e ka mbështetur Shqipërinë përgjatë gjithë rrugëtimit të saj, që nga dita e parë.

Në një vend që mbështet zgjerimin dhe që, siç e thatë me të drejtë, mbështet Ballkanin Perëndimor, duke njohur rëndësinë e tij në shumë aspekte, por edhe lidhjet e tij me Bashkimin Evropian.

Hungaria është një vend që e ka dëshmuar konkretisht këtë mbështetje, jo vetëm përmes dy ekspertëve, jo vetëm përmes takimeve dhe marrëdhënieve të shkëlqyera politike që kemi ndërtuar, por edhe në shumë fusha të tjera, përfshirë praninë e rëndësishme të kapitalit dhe investimeve hungareze në Shqipëri.

Marrëdhëniet tona dypalëshe mbështeten në rrënjë të thella historike dhe në një miqësi të gjatë.

Ju përmendët atë histori të veçantë që qëndron në themel të miqësisë sonë historike, historinë e heroit tonë kombëtar dhe të udhëheqësit të madh hungarez János Hunyadi, të cilët qëndruan së bashku në mbrojtje të qytetërimit perëndimor.

Është një kapitull për të cilin jemi krenarë, një kapitull që na ka shoqëruar në ndërtimin dhe forcimin e mëtejshëm të kësaj miqësie.

Sot, ne e çojmë përpara këtë trashëgimi përmes një marrëdhënieje të fortë dypalëshe, një partneriteti të qëndrueshëm si aleatë në NATO dhe, natyrisht, përmes asaj që është tema ime më e dashur: e ardhmja jonë e përbashkët evropiane.

Kjo nuk është thjesht çështje mirësjelljeje apo tradite diplomatike.

Është një marrëdhënie e ndërtuar mbi besimin, që na mundëson të përballemi së bashku me sfidat evropiane të ditëve tona dhe ta përkthejmë miqësinë politike në përfitime konkrete për qytetarët, vendet dhe ekonomitë tona.

Natyrisht, folëm për anëtarësimin në Bashkimin Evropian.

Kjo është puna ime e përditshme. Është ajo me të cilën merrem çdo ditë. Pjesën më të madhe të kohës ia kushtoj përpjekjeve për t’u siguruar që ta shfrytëzojmë sa më mirë këtë moment, këtë mundësi, këtë mbështetje kaq bujare dhe ndihmë të kujdesshme të miqve tanë, në mënyrë që të bëjmë pjesën tonë, ta meritojmë dhe ta fitojmë vendin tonë në tryezën e Bashkimit Evropian.

Kjo është ajo që po bëjmë.

Ne nuk mund ta bëjmë këtë të vetëm. Duhet të bëjmë pjesën tonë, por për këtë kemi nevojë për partnerë, dhe Hungaria ka qenë pranë nesh që nga dita e parë.

Siç e përmendët, Hungaria luajti një rol vendimtar gjatë Presidencës së saj të Këshillit të Bashkimit Evropian, kur ne hapëm grupkapitullin e parë të negociatave.

Kjo ndihmoi në përcaktimin e rrugës që ka rezultuar e suksesshme deri më tani, dhe është diçka që nuk mund ta harrojmë.

Për këtë, më duhet të them: köszönöm, faleminderit.

Paketa e Zgjerimit e Bashkimit Evropian, e publikuar më 4 nëntor, përmban një analizë të hollësishme për Shqipërinë dhe të gjitha vendet kandidate.

Por këtë herë ajo kishte një rëndësi disi më të veçantë, sepse për herë të parë përfshiu një element të rëndësishëm.

Ajo që deri më tani kishte qenë ambicia jonë, përmbyllja e negociatave teknike brenda vitit 2027, mbetet objektivi themelor jo vetëm i Ministrisë, por edhe i ekipit tonë negociator, i Qeverisë dhe i vendit tonë në tërësi, sepse tashmë kemi të gjithë vendin të angazhuar në këtë proces.

Dhe tani, për herë të parë, ky objektiv është pasqyruar edhe si një udhërrëfyes në bashkëpunim me Komisionin Evropian.

Natyrisht, kemi nevojë për Komisionin Evropian, i cili negocion në emër të Bashkimit Evropian. Por kemi nevojë edhe për shtetet anëtare, sepse në fund të fundit janë ato që do të marrin vendimet, dhe është pikërisht kësaj bashkësie që ne do t’i bashkohemi.

Objektivi ynë mbetet i palëkundur: përmbyllja e pjesës teknike të negociatave brenda vitit 2027 dhe, natyrisht, anëtarësimi në Bashkimin Evropian brenda kësaj dekade.

Edhe një herë, këtë do ta bëjmë së bashku.

Do ta bëjmë përmes një procesi të bazuar në meritë, përmes reformave dhe duke bërë atë që është e nevojshme për vendin tonë, përpara se të jetë e nevojshme për vetë procesin e anëtarësimit.

Por, nëse kjo i shërben edhe procesit, atëherë përfitimi është i dyfishtë.

Folëm gjithashtu për nevojën që marrëdhëniet tona të shkëlqyera politike të shoqërohen nga një partneritet ekonomik po aq i fortë.

Është bërë shumë, siç e përmenda unë dhe siç e përmendët edhe ju. Por jam i bindur se ekziston ende një potencial i konsiderueshëm i pashfrytëzuar.

Na takon ne të përcaktojmë rrugën përpara dhe të sigurohemi që t’i përdorim plotësisht mekanizmat që kemi në dispozicion, duke krijuar edhe mekanizma të rinj, nëse është e nevojshme.

Mbi të gjitha, duhet ta shfrytëzojmë këtë mundësi të jashtëzakonshme për të zgjeruar bashkëpunimin ekonomik dhe tregtinë, për të krijuar mundësi dhe për të afruar njerëzit, veçanërisht përfaqësuesit e biznesit, duke përdorur çdo mjet që kemi në dispozicion.

Për këtë arsye, shpresoj që vitin e ardhshëm të mund të organizojmë mbledhjen e radhës të Komisionit të Përbashkët për Bashkëpunimin Ekonomik. Ky është një nga mekanizmat e rëndësishëm që mund të shfrytëzojmë.

Kemi qenë gjithashtu dëshmitarë të një revolucioni në kontaktet mes njerëzve.

Kemi parë një ndryshim rrënjësor në lëvizshmërinë e qytetarëve, si nga Shqipëria drejt vendeve të tjera, ashtu edhe nga jashtë drejt Shqipërisë.

Vitin e kaluar pritëm një numër rekord vizitorësh, 12.4 milionë, prej të cilëve më shumë se 70 mijë ishin nga Hungaria.

Çdo vit, gjithnjë e më shumë hungarezë vizitojnë Shqipërinë.

Kjo është një shenjë e mirë. Do të thotë se ata vijnë, e shijojnë qëndrimin e tyre dhe, kur kthehen në shtëpi, u tregojnë të afërmve dhe miqve për përvojën e tyre, duke nxitur edhe të tjerë ta vizitojnë vendin tonë.

Jam i bindur se jemi në një rrugë shumë të mirë.

Kjo nuk ka ndodhur rastësisht.

Ka ndodhur edhe sepse Hungaria është e përfshirë në një tjetër sektor kyç të ekonomisë sonë: transportin ajror.

Wizz Air ka ndryshuar rrënjësisht mënyrën se si njerëzit udhëtojnë nëpër Evropë. Ajo ka ndihmuar gjithashtu që aeroporti i Shqipërisë të bëhet më i madhi në rajon.

Numri i personave që vizitojnë Shqipërinë është rritur ndjeshëm.

Ju përmendët 19 vende. Wizz Air operon 14 destinacione nga Tirana. Është kompania më e madhe për nga numri i destinacioneve dhe i pasagjerëve.

Ky është një shembull i shkëlqyer se sa shumë mund të arrihet brenda pak vitesh, dhe ne jemi jashtëzakonisht të kënaqur.

Wizz Air ka 14 avionë të bazuar në Shqipëri dhe së shpejti do të ketë edhe një të pesëmbëdhjetë.

Kjo do të thotë se është mirë për biznesin, mirë për zhvillimin, mirë për lëvizshmërinë, mirë për Shqipërinë, mirë për Hungarinë dhe mirë për të gjithë.

Më lejoni të them edhe disa fjalë për sigurinë dhe stabilitetin, për Evropën tonë, për sfidat me të cilat përballemi dhe, natyrisht, për kontributin tonë të përbashkët në fushën e sigurisë.

Hungaria është një partner i rëndësishëm për Shqipërinë dhe për Ballkanin Perëndimor.

Ju përmendët praninë e Hungarisë në KFOR dhe EUFOR, por edhe përpjekjet e saj në forma të tjera për të mbështetur zhvillimin, bashkëpunimin rajonal dhe marrëdhëniet më të mira mes vendeve të rajonit tonë, si dhe mes rajonit dhe Bashkimit Evropian.

Nuk ka dyshim se rajoni ynë, Ballkani Perëndimor, ka kaluar përmes një transformimi të thellë.

Sot, fjalët kyçe në rajon janë bashkëpunimi dhe perspektiva evropiane.

Por progresi nuk duhet të na çojë drejt vetëkënaqësisë.

Puna në rajonin tonë nuk ka përfunduar ende.

Vazhdojnë të ekzistojnë cenueshmëri dhe çështje që kërkojnë vëmendjen tonë, vëmendjen tonë të përbashkët, dhe që duhet të trajtohen siç duhet, në mënyrë që këta dy elementë, bashkëpunimi rajonal dhe perspektiva evropiane, të mbeten të fortë.

Kështu, vendet e rajonit, individualisht dhe së bashku, do të mund të vazhdojnë të ecin drejt Bashkimit Evropian.

Si aleatë në NATO, ne konsultohemi shumë shpesh. Këtë bëmë edhe sot.

Takohemi sa më shpesh të jetë e mundur, kudo që na jepet rasti, për të shkëmbyer pikëpamje, për të krahasuar vlerësimet tona dhe për të parë se si mund të vazhdojmë të kontribuojmë së bashku për sigurinë në rajonin tonë.

Sepse kjo është ajo që bëjnë partnerët. Kjo është ajo që bëjnë miqtë.

Edhe një fjalë të fundit.

Diskutimet tona të sotme konfirmuan një gjë: thellësinë e miqësisë sonë dhe vendosmërinë e përbashkët për të kontribuar në të ardhmen tonë të përbashkët.

Edhe një herë, e nderuar Zëvendëskryeministre, Ministre e Punëve të Jashtme, por mbi të gjitha, e dashur Anita, ju falënderoj për mikpritjen tuaj të ngrohtë, për frymën e hapjes që ka karakterizuar marrëdhëniet dhe komunikimin tonë deri më tani, si dhe për këtë rast kaq të veçantë.

Jam krenar që vizita ime e parë zyrtare në Hungari është shoqëruar me kaq shumë ngrohtësi, mirëkuptim dhe mbështetje.

Ju faleminderit shumë.