Ministri për Evropën dhe Punët e Jashtme, Ferit Hoxha, deklaroi në një postim në rrjetet sociale se Shqipëria dënon me forcë një tjetër sulm brutal në shkallë të gjerë me raketa balistike dhe dronë të nisur nga Rusia ndaj objektivave civile në Ukrainë, duke e cilësuar atë si një shpërfillje totale të jetës dhe dinjitetit njerëzor.

Sipas tij, gjatë këtij sulmi u godit edhe kompleksi rezidencial ku banon Ambasadori i Shqipërisë në Ukrainë, duke e vënë jetën e tij në rrezik serioz. Hoxha e cilësoi këtë ngjarje si të papranueshme.

Ai theksoi se targetimi i zonave civile dhe vënia në rrezik e personelit diplomatik përbëjnë një përshkallëzim të rëndë dhe një tjetër kujtesë të kostos njerëzore të agresionit të vazhdueshëm rus.

Më tej, ministri u shpreh se lufta e nisur nga Rusia ka zgjatur shumë dhe se, për më shumë se katër vjet nga pushtimi i paligjshëm në shkallë të gjerë, Rusia ka sulmuar vazhdimisht infrastrukturën energjetike, shkollat, spitalet dhe banesat në të gjithë Ukrainën. Megjithatë, sipas tij, ajo nuk ka arritur të thyejë guximin, vendosmërinë dhe qëndrueshmërinë e popullit ukrainas.

Ministri Hoxha deklaroi gjithashtu se Rusia nuk po fiton luftën, por po shkakton vdekje, vuajtje dhe shkatërrim.

Në përfundim, ai përsëriti thirrjen ndaj Rusisë për të ndalur menjëherë sulmet, për t’i dhënë fund luftës kundër Ukrainës, për të respektuar ligjin ndërkombëtar dhe për t’u rikthyer në negociata.

Ai nënvizoi se Shqipëria do të vazhdojë të qëndrojë pranë Ukrainës dhe të mbështesë sovranitetin, pavarësinë dhe integritetin territorial të saj, ndërsa shtoi se përgjegjësit për këto sulme duhet të mbahen përgjegjës.

Gjithashtu, u bë e ditur se ambasadori i Federatës Ruse në Shqipëri është thirrur për shpjegime.