Ministri për Evropën dhe Punët e Jashtme, Ferit Hoxha, priti për herë të parë Drejtuesen e re të Delegacionit të BE-së në Shqipëri, Ambasadoren Sofia Moreira de Sousa.

Gjatë takimit u zhvillua një shkëmbim thelbësor mbi procesin e anëtarësimit të Shqipërisë në BE, duke përfshirë përgatitjet për momentet e ardhshme në udhëtimin evropian dhe rëndësinë e ruajtjes së ritmit dhe momentumit të negociatave.

Ministri Hoxha nënvizoi angazhimin e vazhdueshëm të Shqipërisë për të realizuar reformat dhe për të përparuar me vendosmëri në të gjithë kapitujt negociues.

Ai theksoi se procesi i anëtarësimit duhet të mbetet i bazuar fort në meritë, rezultate dhe besim të ndërsjellë. Sipas tij, Shqipëria po bën pjesën e saj, me vendosmërinë, disiplinën dhe ndjesinë e qëllimit që kërkon ambicia e saj evropiane.

Ministri Hoxha theksoi se qasja e Shqipërisë është e qartë: përmes reformave, vendi sjell më shumë Evropë në Shqipëri çdo ditë, ndërsa ecën me vendosmëri dhe qartësi drejt përfundimit të negociatave dhe objektivit historik për t’u bërë anëtar i Bashkimit Evropian brenda kësaj dekade.

Në përfundim, Ministri Hoxha i uroi mirëseardhjen në Shqipëri Ambasadores Moreira de Sousa, duke nënvizuar se suksesi i saj do të jetë një sukses edhe për partneritetin e veçantë mes Shqipërisë dhe Bashkimit Evropian.

Ai theksoi gjithashtu se zgjerimi është një sukses i përbashkët: më shumë përparim për Shqipërinë, por edhe një investim strategjik për një Evropë më të fortë, më të sigurt dhe më të bashkuar.